jeudi 5 octobre 2017
suite histoire patoisante
L'tripée à Rocourt .
Batich 'mon dé ch' ti Châl' s modèle ed braf' garchon
Comm' ch' est d 'man el ducass' so tuer l' ind ses cochons
Ein 'fein ' bouqu '? Ch'est n'n'est ein ! du bouon il o quère.
Mais sin bé difficille , après chinq ans ed guerre ,
Gramint ed restritions et s' n'appétit fort gran,
Est dév'nu , par bouonheur ,ein 'vra bouque à tout gran
Batich' seut ch' qui est bouon , j' vous l' ditet j' vous l' répète.
I n'est pouon biau pour sûr , aussi seu qu'ein 'équette
Ein tite tête ed mouton et gramint d'brin d 'judo
Ouais ! ch'est in triste à vir , comme in dit à Arros.
Si sin corps est mal fouot , pauvère criature,
Pourtant d' in aut 'côteu , il o r' chu dé l' nature
Ed sacré's qualités : il o l' coeur sur es man ,
I donn' roët tout ch' quil o ,et , pon pus tard qu'édman,
Tout in monne ed' Rocourt à l' tripée il invite .
Aussi , pus d'temps à perte , i faut alleu fort vite .
Edouard mon dé ch' tit cul , ech charcutier , est lô
Et sin commis Nestor arrif' juste à vélo
Nous deux homm's , dins ch' l' étaff , suit' nt nou ami batisse,
Vont truver nou pourcheau qui s 'étonne et ravisse.
Ch'est pluss qu'in cochon cros , i 'fouot au moëns deux chints,
Blanc , cleur comme in naviau , et des yux inochins.
I' r' sonne à in boudin in hiaut d' quate alleumettes,
Calm ',douch' ,né s' doutant pon des intintions d' ses maîtes.
Su' ch ' mont d' fienà c^teu , paf ! il est rétriqué
Et , si habill' qu' à dir , Grognon est harnaiqué.
quemalheur tout d' meime , es dit grand père Batiche !
Pour el plaisi d'sin vint ',faut qu'ein bête all' patiche ?
Pourtant ech cochon chi , n' in o ponne in mouo,
M' o rapporteu in prix à ch' concours ed' Saint-Pô.
I pinsez vous mes gins ? mill 'francs , pis ein' médalle,
Et Edouard ed 'réponne : "i 'faut bien qu' in s' régale
In moneu aujord'hui , allons ! pourquoë s' biler?
Ch' n' est pon l' momint , min fiu , i faut tout oublier .
Ch' est à causs' dé l' médall ' qu' té t' tracass's ed' la sorte ?
Hein ? Tin pourcheau est mort , l' médall ch' est ti qui l' porte"
Midi sonne à ch'cloquer , in vient d' sortir del' messe.
Ech cortech' d' invités pour l 'tripée s' impresse,
Bien à l'heure in arrif , suir chés préparatifs,
Et , comme in est a's bouq , pour boire l' apéritif,
Dins l' granche à z' avétis , in avanche ,in print plache
A l' taff si bien dréché qu'in s' creuroët au mariache.
Tout autour sont pindus des couverc's , des lincheus
Qui much' nt el' palle ,ech fien et pis d'chés vaques,
Gramint d' fleurs tout partout , à vous y reinn' patraque .
Tout l' monne est arrivé , in rope ouin bayette,
Et trint deux invités sont prêts pou ch'cop d'fourchette.
Chés jonn's et pis chés viux sont bien apparillés;
Deux femm's ont su leu gron , leus jonn's intortillés
Su l' taff 'n'in o déjo , bien cach' té 's six boutelles .
Du chit' ? Détrompez-vous , ch'est d' el bouonne hydromelle
Chés patrons ont fouot seinn'qu'i folloèt y alleu .
Et chés verr's in moins d'deux sont plans jusqu'à coupleu .
Batich s' intampe alorss ,hauchant bien haut sin verre ,
Bouot al santeu ed tertous , et d' chés cochons , nous frères.
In wide et in rimplit pour bien qu'mincher ch' l' arpos,
Et Batich' ,pour l' éximp' fouot toudis ch' premier po .
Après ch'l'apéritif , ch'est adon qu'in s' régal
D'el soupe ed cô eu d'tête , ed pieds el pis d' frigale.
Pour qu'all' tiench 'pluss au coeur , in y o fouot trimper
au liu d'du vermichell' , des morciaux d'pan grillé,
des crout's comme in dit chi et aussi des légueimmes:
Des carott's (pour chés homm's ) , des porions (pour chés feimmes),
Car aveuc des carott's , des fess's durt's ous érez .
Et aveuc des porions , ch'est sans mau qu'ous pich' rez
ein ' soup 'si tant épaisse armet sin coeur à plache ,
Satisfouet s n' estomac et vous donn' du courache .
Pou ch'l'homme in bouon cantëu ,n'o mi b' zouon d'fin morciau
Comme i n'in faut à l'aute qui o du sang d'naviau .
au villach 'ch' est comm'no , inn'est pon difficile ;
In s' monque ed ' vous souvint , in pass' pour imbécile ,
Mais n' vous fajez pon , couchez-vous à côteu .
N'o qu'in seul bien qui compt ' ,j'vous l' dis : "in bouonn'santeu"
Ous z'ét's malat ? ch' med'çin , in vous tassant vou pouche ,
vous ordonn'ro in banet toute ein séri'd' douches .
N' l' accouteux pon , mon diu ! I so vous foir'morir !
Répondeux y "docteur ? né m'fajet pon fermir ,
Parlez min d'in gueul' ton , parlez min d'ein tripée !
Pour dérider viv'mint ein figur' tout fripée !
ch'est in r'mèt radical ! aussi , pour aujourd'hui ,
Faut bien minger à ch' t' heur' pour bien dormir à nuit " .
In sach' consel , faut l' suirt . Donc , in rimplit ch'z 'assiètes ,
Et pis jusqu' à ch' plafond in fouo sauteu chés miettres ,
Subtil 'mint in s'infile in biau morciau pomon
au mitan d'in jus noir sintant l 'al et l'ognon,
Pis ein grillate ed fie aveuc bien des carottes,
In moneu d'pateu d' ochs pour foir' comm' tous chés autes .
Et in s 'pourlèqu ' s ses douogts , in barboull' sin minton ,
Et pour étoufé toute , in avale in pinton .
Beuvons pour minger d' pluss' , beuvons , beuvons d' el bière .
Alle est l 'gerte , elle est fraîche , all 'pétill dins nou verre ,
all' mouss bien , elle est cleure , et pis all 'sint l 'houblon .
all 'rafairchit miux qu' toute , aussi beuvons , beuvons .
Trouos heures ! I sonn' chés vèp's . Presqu'sans r' preinne halonne
In r 'minge ein nouvell' foës du fie aveuc des pronnes ,
Du boudin , après chlo aveuc des p' tits rogins .
Comm' chés assiett's sont sal's , in les r' tire à chés gins .
Ch' est la fin d'el tripée , mais ch' millieu est à foire :
In rapport' sur el taffe ed quoë minger , d'quoë boire .
Ein superpe équinée est plachée au mitan .
Mais tous chés estomacs s' arbut 'nt ed d'vant si tant ,
Ch' n' est pus d'el bièr ' qu' i faut , mais du bouon vin ed marque
Pou pouvoir avaleu cin 'trinque ed ' viann ' si larque !
In couin d'oeul ed Batiche à sin biau fiu Léon
Es' tradui sur el 'taff par du Saint Emilion .
In vide et in rimplit ; chés esprits is 'écauffent ,
Trouo foë s , in 'in quart d'heure in ermonte ed chés bofes
Du vin blanc , du vin rouch , du brindevin , des liqueurs ,
Pour fêter ch' cochon mort et animer chés coeurs .
In bouot des mass's ed vin et pis pus d'ein bistroulle ;
In implit sin vinte à foir craquer s' berdoulle ;
In est in moneu rosse , in cant' des p'tites canchons
Et in pass' lo des heur's aussi gais qu' des pinchons .
In crie , in ris , in danse et in jouquelle ein zique
Aveuc es cavalière in accoutant l'musique .
In s'in r 'vo tard au vèp ,chaquin sd sin côteu
Balanchant in moneu d' esch' l' alcool intonneu .
Batich' gagne es mansarte , laichant couleu ein 'larme ,
Et confie à s' grosse ' Luce ,aussi solit ' qu'ein carne :
"Vraimint ch' est trop d' hnneur pour el mort d'un pourcheau;
A m' n' interr'mint f ' ra -t-on tant d chimagré 's qu' esch lo ? ".
Pierre Sébert .
( 1er prix 1947 au concours des Rosati d' Artois )
---------------------------
Carnaval .
Mariache mascarate et bal masquei .
V'lo biau mariach' qui passe aveuc musique in tête
Profitons z'in pour rire ech n'est pon toudis l' fête
Pindant qu'nous somm's cor jonn's i faut bien s'amuser
Et laicher ch'ti qui veut passer l'temps à buser
Aujourd'hui ch'n'est pont l'jour ed pinser à ch'ménache
Beuvons ch'qui est versëi . Quand ous ch'rons tertous viux
Et tout romatiqués adon ous pourrons pus
El jour ed carnaval crier " vife ech mariache ! "
In n'peut in disconv'nir , Avesn's est révillé
Et pour nous assouffir in fête Loetaré
Su'l 'pavée in grand's pomp's , i défile ech mariache
Qu'i 's sont biaux chés masqu's ! tout l'monne est lo bénache
Ed savoir ech ti qu'ch'est , ch'est'i Louis ch'machon
Ou ch'est'i Charlemann' ? Chaquin veut dire el sienne.
Foir des suppositions ; In dit qué l'bell jonn'feimme
Aveuc es poétreinn' forte est peut-ète in garchon
In dit qu'ech tiot manant , malgré s'queu' d'hirondelle
A biau bien s'ardrècher à l'bros d'es'n' haridelle
Lis pis capote à pans , i n'o pont l'air malin
Elle , comm'su d'zéquach's , aveuc ses mollets fins
Comme in cot es' pourlèqu' . Nou jonn'feimm' si tranquille
Ravisse tous chés homm's et leu foêt des yux ronds
Allons ! Ch' n'est pont dé s'faute si sin coeur est fragile !
Ch' est dé l'faute à l'amour , vraimint all'n'in peut pont
A s'rassiro tout'seule aveuc in moné d'âche
Et ein séri d'éfants li r'donn'ro la raison
Ch'est sûr ! Dins queuqu's anneuï 's , a n'ch 'ro pus si volache
Quans alle éro douz'fil 's et in biau gros garchon .
Avesn's n'voët pont souvint ein 'si bell mascarate
Et pou insi biau jour ,tout l'monne est camarate
Pour bien finir el 'fêt , pour pouvoir s'amuser .
In prind chés musiciens qui vous font bien danser
L'orchestre es'met in route "In plach 'pour ech quadrille "
Et sitôt chaq 'garchon saute ed'sus ein jonn'file
chés feimm's dont des g'nouillons aveus leus cavaliers
Si bien qu'chés deux bell's mèr's in pert'nt té leus garr'tièrs
Chés viux , chés gros panchus comm'des tonniaux d'bassure
In claquant du talon batt'nt tant qu'i's peut'nt la m'sure
Et tout ragaillardis pins'nt au fond d'leu coeur
" Dins nous jonn'temps ,danser , ch'étoét tout nou bonheur "
Infin , i faut bien l'dire
Ch'est in biau Carnaval
In biau Mariach' pour rire
Et pis in joli bal
In peut cor'dir' d'Avesn's
Quand in veut in parler
Toudis il y cacheinne
Quand ch'est pont l'pleuf
Qu'all qué .
P. Sébert .
-------------------------
Ech 'minteux.
Connu d'in tout ch'canton pour ête in ablayeux
S'réputation d'Batiche al douo d'sin baptème
Toudis ed'ché premiers à ch'concours ed minteux
Quand il éteu seul , i s'mintouo à li même .
il aveu fouo la guerre ,mais sans connoite la frousse
Aveuc des grands coutièwes , fusiques et baïonnettes
I l'aveu r'truvé mort plusieurs fouos din la brousse
Perché d'trouo quate rafales ed balles ed mitraillette
A l'ouverture del chasse , malgré ses romatiques
I courreu din ché camps bien pu fort qu'in vio rouche
I poyeu tuer queuque foupo , trouo lièfes d'hui co d'fusique
Pi invoyer du plomb n'importe u , k'cha bouge
.
In ne fouo qu'i aveu tué core plus ed' d'habitude
In l'a vu r'v'nir au vèpe , certain 'min ech 'dernier
I porteu sin fusique, sin tien sans lassitude
Et pi pa d'su l'marqué , i porteu ch' porte carnier .
Des gardins ! din ch'villache ! i n'aveu pon d'pu bio
Al l'intin'ne , i fallu binardeu ses porions
Ech l'été ,core pu fort ! pour carrier ses navios
Il a fallu qui ralarguiche ech' portillon .
L'aute jour , au cabaret , qu'il aveu inne belle pranne
I r dijeu ses cacoules et pi ses mintiries .
chés gins i l'accouteutent sans l'croire el moins du monne
vla ti pon k'tout d'in kiwe , v'la qui vouo Challe qui rit ,
" Ta l'air d'et foute ed mi , et ché pon l'première fouo
j'té dis la vérité , je n'min pont , diu merçi ! "
Alors challe i répond " ch'est certain qu'ej té crouo
Mais quand ej mintirai , i faudra m' croire aussi " .
R. Ducroquet .
---------------------------------
Ech nid d'malo .
Ch' éteu au mouo d'setimpe , quand in carrie s'z'avannes
Incrinqué din in ape , Gustin ceuillo des pinmes
I N'y aveu gramint d'souon tellemé qu'al éteute bonnes
Et pi d'les laicher quère in seu bien qu'cha z'abime
"jé s'z'é mettrai parer bien au seu din ch'gernier
Pi j'les mettrai au couoï pour qui s'ingèlté pont
Pou chlo asseurémint ech m'in vais m'dégrouiller
d' inrporteu min panier , à coupleu al mason " .
Mais lo d'su , vla ti pont , quech ti Jules qui s'délanche
Pi qui s'assit dolo , edsu inne grosse muflote
In poussant in "aie,aie" qu'ch'est rapport à s'grosse panche
qu'ch'est inne calamité , ejvous dit , ol vérouotte
"Hen bin min ,'ti Gustin ! té core rudmé suptil
Taleur to t'rétaleu pi finne tin pagnon d'cul
Mais ti té pont dorèwe , pi té treuve toute facile
Mi , ch'traval m'poursuit , j'fouo comme in kvo , j'rafule
Ech su pu janne ek ti , mais jé n'peux pu rien fouare
Taleur em' v'l'o podaque , cha m'brule , cha m'coache , cha m'pique
Pi cha s'méchanti , ech tel dit , té peux m'croire
Ech docteur i m'a dit ek ch'éteu ed l'artrique
El pire , quand in vient l'vèpe , ech peux pu m'memburnir
Et quand y so pleuvoir ! Cha m'donne ed ché lonchures !
Des fouo qu'ej su parti , vla qu'éj peux pu inrnir
Cha craque din tous mes oches comme inne vièle arnékure
I n'faut pont l'esclandir , j'su à longue maladie
Et pi d'ichi keuque mouo ech touchrai em pinsion
D'ed vire monteu à l'ape , asseuré ech t'invie
Pour el 14 juillet ? T'montreu core ach Kévron "
Mais in dijant tout chlo , Jules aveuc sin bâton
Cafouilleu al mufmlote du qu'i v'neu d' s'ajouquer
V'la ti pont qu'in druquin , ed zou sin patalon
In échan ed malo qui s'apprète à chamer
V'la min Jules qui s'rintempe , met ses gambes à sin co
Comme inne balle boche i passe tout pa d'zeur d'el cloture
Sans même es démerler à tout ché fiderco
O n'avez jamouo vu courrir d'inne telle allure .
Assuré ,d'tout ché maux qui nous rint' té martyr
din inne si belle nature ,in treuve toudi ch'l'aspro
Ech pocheu pi ch'médeçin ? quand on s'sin décatir
cha n'vaut pon , chlo ch'est sur , in bio gros nid d'malo
Pi fo foire attintion sur quouo ki vient s'assir
ch'est inne bien grande morale pour el tite histoire lo .
R. Ducroquet .
.................................................
Ech pu suptil ed'ché dèwe .
" Dimanche après les vêpres , il y aura procession
Arthur ! Je compte sur toi pour porter ST Joseph
TU t'en es bien sorti pour celle des Rogations
Tu te mettra devant , c'est toi qui fera le chef "
Arthur n'est pon dévot , mais inne fouo à l'écapée
Sans vouloir foir d'ablaye , i mettro s'rhrabillure
Et pi , on n'peut pon rien inrfuseu à ch'curé
Tout l'zans y donne des pronnes pour foire del confiture
Ech'jour lo arrivé , falleu vire ech cortèche !
Ech 'curé , ech bédèwe , et pi ché z'éfants d'choeur
Et pi nou St Joseph incrinqué sur deux perches
Pour vire passeu tout ch'lo , y falleu inne mi-heure .
Echoui des z'avé pi d'ché Magnificat
Arthur s'mongonnouo ed carier St Joseph
Si seulmé au lieu d'dèwe , in erreu été quate !
S'esquinter pour in rié , comme in dit pour des nèfles !
In bon diu , nin na in , car sacré nom des zo
vis qu'a deux ingambées pindant ch'confitéor
kouo qui vouo luire comme no , a coteu d'in bouzo ?
Ch'est inne pièche ! ch'est in sou ! mais , ch'est in louis d'or !
Din seul kiwe y s'ajouque et pi ramasse el pièche
St Joseph i bourloute et pi tout l'monne ravisse
Arthur tout défoutu " j'ai rien fouo pour ki kèche
Ch'curé so m'ingueuler sitôt r 'nu ach' l' église "
"Faut pu s'fier à personne vraimé n'a pu d'amis
Nin no qui son à sou !!! i s'frouotte bien épotrer
Heureu s'mé qu'j'ai fouo vite , il l'aveu vu d'vent mi "
R. Ducroquet .
Inscription à :
Publier les commentaires (Atom)
Aucun commentaire:
Enregistrer un commentaire