I sont sots tertous .
O n's avez pon chou qu'ch'est , qu'd'étes sot pindant trinte ans
Ben z'avez del chance , et peut ête qu'o m'creuré
Ed pu 1913 , équ' jétouo à St Venant
I m'ont ouvert el porte , ech viens juste ed rintrer
Mais comme o m'véyez lo ,j'in su pon core certain
Ek ché ch'med'cinlavo i n'es 'sont pon trmpés
Car ech' m'in vais vous dire , k'pon pu tard qu'ach matin
Jai bien pinseu qu'ché gins m'invouoyeute al bibée
Ej rinte d'in ch'restaurant pour minjer in morsièue
Du k'ch'est qu'édvant , la guerre ej dénouo pour trinte sous
Mais toute éteu canjé , ch'éteu gramin pubièue
Ta jusse quà boire inne chope , in t'met un rond pas d'zou
Assuré , d'pu adon , n'aveu eu du progrès
V'la qu'in m'met deux assièttes ,deux coutieues pi trouo verres
comme si qu'à nous mason in fouo pon d'manières
Arrivé al bistoule , j'édmanne combien qu' ej douo
" Monsieur à bien mangé ! cela fera 1. 000 francs "
Ej ravise sans comprinne ech papier d'in mes douo
J'sinteu mes gambes filer comme quand ej su bien rkran
" Ben m'in homme , os savez , j'porrai pon vous payer
L'dernière fouo qu'j'ai v'nu chi , j'ai diner pour trinte sou
Aussi o m'escuzré si j'su imbarbouillié
Mais j'vous parai , ché sûr , j'en su pon in voyou"
Ech t'homme ,ch'éteu in bon , et tout in rigolant
"Bien sûr mon brave , bien sur , pour quand vous reviendrez
Et surtout j'vous en prie , ne r'vnez pas spécialement
Vous causer des ennuis ! jamais ! je m'en voudrais"
"Et bien , vu qu'ch'est comme no , j'mé vous donneu 20 francs
Cha , n'chra qu'un n'tit acompte ,ché toudi miu qu'inrien "
Lo d'sus j' désaque d'em 'poche in louis d'or ,un grand
si j'en n'aveu eu d'plus ! Mais ch'éteu tout men bien .
Ché lo qu'j'en 'comprin pu , mais alors pu tripette
In m'inrdonne du café ,in jnef et pi du rhum
cha r'fagouo inne deuxième bistoule ed 'garchonnette
Ech k'minchouo à ête rosse au bien ch'éteu tout comme
Aveuc tout clo in m'rind des billets , pi des gros !
"C'est la monnaie d'vot pièce , tout cela , c'est à vous "
O bien j'au pon guèri , ou i sont sots tertous .
R . ducroquet .
...................................
foire d'avril , foire al belle file .
Ed 'pu el s'man'n passeu , arriv'té au marqué
Des jus ed 'toutes les sortes , esqu'ch'est à n'pon y croire
I sont lo bien muchés , d'zou des bâches radiablées
suppose des jus d'bidets et pi des balanchoires
chés jan'n , i sont fin sots , intempés , tout grejlés
in 'n nasse ed 'zou leu nez et leu mans din leu poches
Ils sont lo d'pu l'matin et jusqu'à l'inchinée
A s'berdleu din chés yèw ; forra réchuer chés cauches .
Mercrédi matin timpe ché l'foire ed fin avril
Chés cinsiers d'ech canton , y z'aman'n n'té leu vaques
Leu vios et leu pourchau , mais ché l'foire al bel file
Et chés carettes , a s'suitent , imbernéquées ed' raques .
Chés qu'vos désarnékés " au canard" , "mon Ninie"
In déquerque chés paniers , in s'rafule in moneu
Pi in monte ech' pavé . N'in n'o su deux ringuies
Ed'z'avons ed 'toutes sortes des rouches des gris des bleus
ch'lo qu'in treuve ed 'toute ,des soleus à boutons
Des grosses capotes ed'vlour , des long bâtons d'chuque d'orge
Des barres ed 'pan d'épice , des lapins , des capons .
chés tirloteux y cri 't , ch'est à croire qu'in z'égorche
T t'atrap'par tin bro , i z'ahoupent chés cotrons
3 Acate à mi Marie , o z'irez au paradis "
I brij 'té des assiettes , tous chés mouoyens sont bons
Aveuc tout leu tardioles , in n'y est fin échoui
"Ravisse min ech'ti lo , k'min qui l'aval du fu !
I so s'brûler ses loupes ! Dis min ! pourkouo qui l'maque "
" Ché pour gagner des sous , mais j'cro bien , min n'ti fiu
Qui n'avale pon du fu , j'idé puto qu'i raque "
Comme tous chés mercrédis ,ech bure , ch'est d'zou ch'marqué
Cheés fin'm , y s'in 'occup't ; chés hommes y sont chamés
In discute pour chinq sous "faut qu'ech pache min vaqué "
"Il a ch'gout del noyette ! assayez 'lé in moné "
Ch'conconnier , pon certain , aveuc es n'onk ed' pouche
In print in 'ti burin , ravise si n'a pon d'buque
I liève tu duchet'min , jusqu'à hauteur d'es bouque
Et papète in momin comme si ch'éteu du chuque
In face , cha tourne , cha cante , cha crie , ch'est chés manèches .
Pou l'première fouo à Avin'n , in a eu in casse-gueule
In ju aveuc des kan'n et des cadots comme sièges
In s'pousse et in s'achoque , in fouo des bons d'chevreul
chés jan'n , y sont mawo , leu mère à les rapaj 't
"I n'on jamouo asseu " " Tin vo t'fouare épotrer "
"Té n'vouo pon , mort dé diu , l'balanchoire qu'al rabache "
" In n'y a tout les milles ruses à les faire rabindler "
Chés hommes , i sont in wo , jusqu'a ch'marqué à vaques
Ché parinyo d'Avin'n , qu'ech concours qu'il à liu
In s' pournant ché pon louon , cha n'est pon ch'k'min d'st Jacques
Et ché lo qui s'inrtreuv't et pi chés viux
Inrnouvleu d'leu roulière au bien d'leu belle bayette
Cachoire ed'zou leu bro , bâton à leu peugnet
Et pi in a sorti ché pu belles casquettes
Qu'al sint 'el naphtaline au bien el rinfermé
Es z'esprits i s'ékof't . N'a lo des cabarets
In bouo des tribulettes ed bière in moneu sure
"Kwo qu'u'ch'est d'ech casvel lo ? aussi sèque qu'in sauret ?
Té dis qu'ch'est in'n jénich , cha n'est qu'in vio d'bassure !
Ech jury est in route . N'in no chinq siche Monsiu
Qui ravis'té chés bêtes et qui calod't insan'n
"Ch 'ti lo ché in butor , ch'ti lo ch'est in'n crignu
Ech 'lal ch'an'est in'n bonne , pi lo ch'est in'n caran'n
Ch'est au bout d'in'n coupe d'heures qu'in donne ech'palmarès .
N'in no qui sont contins , mais n'in no qui s'mongon'n't
"A ch' heure , chesti qui faudreu vous fouare des caresses
Pou l'jouo chi , o méritrouot qu'ech vous ayonne
O savez bien tout d'même , qu'min tor ch'éteu ch'pu bio
L'anneu qui vié , o fré bin d'les tirer al buquette
O n'é pon primé ch'tor , oz'é primé ch'capis "
" vous premier prix ,veyez ,cha n'est qu'in'n 'écalette"
Mais , tout ch'lo cha s'arringe aveuc in'n bonne bistoulle
Et pourkouo ahouper ! in qu'minche d'avoir ech dint
Toudis boire , pon minger , in sint qu'in s'imbarboule
"Donne nou in pateu d'tripes , in chra moneu ratin "
Et fin ékanié , in r'déchin par in bo .
"Ech pavé " i s'déblaye et cha qu'minche à Widier
" O son r'jouan'n nou maquin'n et pi ratleu chés qu'vos
Sans chlo o porrouom' bien nous inrnaleu à pieds"
In vers el vèpe , alors qu'in alim'm chés becs ed gaz
In'n bonne douzan'n ed jan'n , in n'peut pon s'z'amatir
I sont lo qui font l'crupe , mais cha ché pi tiyache
Fournak'té din chés cuins , cach'té des cartons d'tir .
Jusqu'à pétrominette , din tous chés cabarets
In n'intind qu'des canchons et des cantes ed rostrals
Fau pon , l'prin'n à malpart , cha chreu bien atombé
Qu'll' foire à porreu pon dénorteu chés "nanals"
I sont tertous prel et bin in'n armonteu
I godral 't ' in druquin , tout chés sous d'leu quinzan'n
N'a in'n masse qui balanch't forreu s 'z 'étinchonneu
I z'ont pu caire in'n pinte qu'in picotin d'avan'n
D'man matin , ech villache , i chra comme in désert
Chés gins n' s' elvront pon timpe , i chront core tout mafleu
"Jouqu'té bien rapuré " N'in n'a d'l'arnu din l'air
I faut quitter ch'cavet et pi r'kmincher s'journeu
Avril et pi octope ché t'in'nbelle tradition
Ch'est aussi respecté qu'elle Pin'coute et pi Paques
Et tout l'z'ans ché parel , ch'est in'n répétition
Ché l'foire al belle file et pi l'foire al belle vaque .
R. Ducroquet .
--------------------------------
In y vo à vire goutte.
Grand père su sin cado , trichouo du glui d'soil
Aveuc des plates ed ronche pour radiableu 'man'lette
Sans s'inrtourneu inne buque qu'echvin éteu à couales
Il ouvrouo su ch'kerpion tranquill'mint à s'patelette
Vla qu'inne finme ed la ville qu'arrête à s'n'aplomb
Pour y d'madeu sin qu'min, "pardon mon cher monsieur !
Pourriez vous m'indiquer si le chemin est long
Pour aller au cimetière rendre visite aux aïeux? "
Ch'éteu inne parisienne affulée d'in capio...!
In grand cotron à fleurs et pi des pinderliques
Ahoquée à s'n'orelle pi pont grand cose su s'pio
Des soleus à z'agules qu'din ché raques cha s'déflique
j'in voreu des parels pour inspiquer porions
Pour servir ed plantoir ,cha douo ète bien pratique
" el chimentière , Madame " qui répond min tayon
In sulvant d'sin cado malgré ses romatiques
" ch'est à inn grile in fer , o n'ai qu'à suire el route
Ej m'in vorouo ed vous invoyer al libée
N'poyez pont vous tromper , o z'irouotte à vire goutte
Car tous chés gins d'Avinne , i z'y vont ziu freumés .
R. Ducroquet .
-----------------------------
Toudi du lard .
N'aveu bientôt quinze jours qu'in éteu dins l'cinse lo
Logés et pi coukés , bientôt miu qu'à s'mason
In aveu comme ouvrache , d'inrmettre des fiderco
autour ed 'ché patures ? cha nouss sanouo pon long
ch'éteu des bonnés gins , el mason du bon diu !
Ech cinsier , pi s'mékinne , n'saveut , pon kouo nou foire
el pire , ch'est qu'tous les jours , chou qu'in a jamouo vu
in nou donneu du lard , du lard , toudi du lard
Pou ch'marcache , asseuré , ch'éteu inne punition
In aveu tué l'vièle truie , qu'in' voleu pu d'ech dale
Rapport quà d'veu avoir fouo s'première communion
Et pi qu'inne fois am'zurz , al kéyeu du haut mal
Inne fouo , qu'ech cro d'orelle qui sinteu l'rincraché
Décidé , j'dis al dame : "t'nez l'lé pou ch'réveillon
Pi , si cha n'vou fouo rien , donneu nou pour canger
Inne platrée d'pouo al crame et pi chacun coulon "
comme d'effet et lindman , jusse qu'in s'métteu al taffe
" T'nez , el vlo vous coulon , j'vous souhote bon appétit "
Mais pindant qu'el patronne éteu partie al caffe
Et dis "ch'est des bizeu car i sont rud'min n'ti"
Et pi , tout in minjant , cha aveu comme inrlin
Comme un faisan qu'in minge , l's'manne d'après qu'il est mort
Mi , in monneu macsièwe , aussi vite ech crie ch'tien
" Ben té seu min garchon , chés coulons n'sont pon fraîches
Pour mi , in'za truvés crévés din ch'coulombier "
"Ah non ! qui dit l'éfant , in s'za tués hier au soir
Pi pleumés ach matin , ché plemmes al sont core lo
Ch'éteu des noirs et blancs , ch'est quand il a fouo noir
Ek min père i s'za pris din ch'nid d'agache lavo " .
R. Ducroquet .
---------------------------------
Cha dépin du k'cha so quère .
D'pu in momin d'ichi , el monne est bien cangé
Tous ché finmes libérées , vla qui font comme leu homme
Et j'ai toudis idée , qu'pour nous foire arrager
I beuvront comme nous z'aute des bistoules pi des rhums
In attindant , i finm't comme des rémeuleuses
Si bien in fajant l'buée qu'in sortant d'ech'l'église
Et i saqu'té d'leu poche in paquet d'gauloises bleues
Mais on s'seu pu k'din l'temps ch'éteu inne boite à prise.
Gramère "Marie toutoule" n'décisseu pon d'priseu
Tellemé ek sin gros nez qui trinouo su ses loupes
I n'y éreu à coup surimpéché d'raviseu .
chou qui pindeu pa d'zou tout près à kère din s'soupe
Ch'éteu l'pu brave des finmes , toudis à rinne serviche
In'ne fouo ek nou facteur aveu fini s'tourneu
Jusse à l'heure ed 'dîner , qu'il éteu inne heure diche
Marie qu'al serveu l'soupe , al dit sans s'inrtourneu
"Facteur ! o z'êtes in r'tard , din'rez vous aveuc nous ?
"Ché d'bon coeur o savez ! dé l'soupe o n'avez caire ?"
"Ben Marie , j'vous r'merci ché bien émape à vous ,
Ch'n'est pont affaire d'horloche ,mais bien du' k' cha so quère .
R. Ducroquet .
...................................
In prangère, pi in quate chevaux .
Pour sur ! ch'métier d'inrprésentant
Faut croire ek ch'est in bio métier
Cha gagne bien pi temps non temps
I sont toudi bien habillés
Tous les jours n'in no à vou porte
I dites tertou qui z'ont des cartes
Mi j'seu bien qui vindreut des crottes
Si in leu mettreu des cocardes
Nin n'o qui sont tellmé aïche
Qui forreu bientôt les poursuivre
Hier jé n'ai core vu chinq siche
Aveuc des belles muzettes ed cuir.
Nénesse ! li, il est bien comme i faut
I vint del bière pour ech brasseux
Du gnef , du douche et pi del iau
Mais li , cha n'est pon in beuveu
In peut dire qu'il est aheuré
I passe toudi mon l'grosse Gertrude
El mercrédi à l'inrchinée
Et cha n'défute pon d'chincq minutes.
L'aute jour , j'seu pon pour que raison
I tape al porte à inne heure vingt
"Intrez ! Poseu vou baluchon "
Nin fouo du temps i pleut ,i vente
Vo n'y avoir du traval sur ché touo"
Nénesse qui n'est pon du villache
I n'conneu pon in mot patouo
Pi qu'Gertrude ek ch'est sin parlache
"Pourqouo k'o z'ètes v'nu in prangère ?
D'canger vou heure ch'est tou nouvio "
" Vous savez bien que l'essence est chère !
que je viens toujours en 4 chevaux ! "
R. Ducroquet
...................................
Les professions de la terre ont bien souvent inspiré les paysans et la campagne , ses paysages , ses coutumes , ses qualités et ses travers ont bien souvent été chantés .
Pour le simple goût de la rime , mais aussi avec un sens aigu de l'observation et de la critique .
C'est ici que Mr Camille Deneuville d' Izel- les- Hameaux , qui nous soumet à titre posthume , une composition satirique pour laquelle il sera difficile de retrouver la chronologie . En effet , chacun se souvient que "le beurre" pendant la guerre était la monnaie d'échange type , qui en son temps aurait pris facilement le pas sur le pétro-dollar .
(extrait de La Voix du nord)
Ech bure .
Chés fêmes , al dites aveuc ech 'bure ché ti in ju
L'mienne par nuit , à n'in dort pu
Dés fouo à s'mongonne , toute indormie
Et si j'y d'mande , quo ché qu'té dis ?
A s'inrtourne , sin nez din ch'mur
Et al répond , cor inclumie
"Ch'est à toute qui faut du bure "
Des points textiles
Pour chés jonnes files
Des bons matière
Pour ché cinsiers
Tout ch'lo , ché bien
Ché miu qué rien
Mais vois-tu min fiu
quêques lives ed bure
ché cor è miu
Ch'est à toute qui faut du bure .
Din ché boutiques
chétout partout l'même musique
N'in n'o pu rin d'pu qu'ché boches y sont partis
In s'in allant , i z'ont tout pris
O n'est qu'à dire "Mi j'ai du bure"
L'patronne à s'homme al crie
Viens chi Arthur
Faut s'arringer
Vlo chi in homme
Qu'il o du bure
Ch'est à toute qui faut du bure .
L'aute jour din l'ville
Rue st Géry
Ech vois d'vant mi
In 'n'belle jonne file
Crénon qu'j'm dis
Vlo chi m'n'affaire
V'nez chi mamzelle , j'paie in verre
Vlo qu'el répond " as tu du bure ?"
Ni bure qu'ech dis ni confitures
Eh bien qu'al dit " T'es trop malin
R'passe ichi d'main matin"
Ch'est à toute qui faut du bure .
El nuit passée
J'avois rêvé
Qu'arrivois au paradis
Saint Pierre y m'dis
ch'paradis
Ch'est point pour ti
Allons qu'ech dis "M'mette in infer
Vlo 50 ans qu'jel fouo sue terre
Ravise din m'poche , n'in ' o du bure"
Alors y dit " Viens par ichi
J'min vo t'mette au paradis"
Ch'est à toute qui faut du bure .
M'vouozine al crie , v'nez al masonne
Nou vaque al pinse à véler
Ech su toute seule no point personne
V'nez tout d'suite sans vous c'mander
Allez qué j'dis "y faut qu'jel tasse"
Tout vo bien no du passache
Tout chés infants étoit contints
S'vaque al vèle ," nou voisin
On pourro foire du laibouli
Del tarte à pronnes , des ronds d'anis"
Ech pu jonne dansoit din sin cadot
I bruissoit comme in malo
El vaque al vèle , ché bien pour sure
Car ché à toute qui faut du bure .
Dé ché cache au bure , in n'faut point rire
que triste métier , no mi rien pire
d'porte in porte d'mander du bure à acater
Sans même pouvoir l'assayer
et pis l'mucher
Pour sin r'naller
Quand y forio chaud , ech bure y fond
Y s'imbarboule din leu cotron
Y fouo des grinnes din leu pouotrinne
Vlo chlo qui s'passe , quel avinture
Et ché à toute qui faut du bure .
Pour in'n'casaque , pour in capiau
Pour in 'n'maronne , in écorcheu
Pour ch'canon ,ech marichau
Toudis du bure qui faut donner
No d'quoi v'nir sot , à y pinser
Heureus'mint nou maire ché in cinsier
Y d'mande point d'bure pour li Marie
ch'curé non pu y n'in pale point
Mais in sait bien qu'à li aussi
In n'live ed bure
Ed temps in temps cho foé plaisi
Ch'est à toute qui faut du bure .
...............................
a suivre .........